బాలలకో బహుమతి - వురిమళ్ల సునంద

⟾  సునంద అత్త ఇచ్చిన అందమైన బహుమతి

వురిమళ్ళ సునంద గారు రాసిన బాలలకో బహుమతి పై పుస్తక సమీక్ష

పిల్లలకి కథలు అంటే ఎందుకు అంత ఇష్టం? ఎందుకంటే కథలు వాళ్ళతో మాట్లాడితాయి కాబట్టి? కథలు, పిల్లల చేతిని పట్టుకొని, ఏవేవో ఊసులు చెబుతూ ఒక కొత్త ప్రదేశానికి తీసుకెళ్లి వాళ్ళు మర్చిపోలేని కొన్ని దృశ్యాలను చూపిస్తాయి కాబట్టి! వాళ్లని నవ్విస్తాయి కాబట్టి.. "అవునా, తర్వాత ఏంటి?" అనేలా పిల్లల్ని తమవైపు తిప్పేసుకుంటాయి కాబట్టి! అరచేతుల్లో జీవిత సారాన్ని చూపించి, మంచి బాట వైపు వాళ్లని నడిపిస్తాయి కాబట్టి!

వురిమళ్ళ సునంద (భోగోజు), రచయిత్రి

బడిలో చదివే పిల్లల కోసం ఎలాంటి కథలు అయితే బాగుంటాయి? ఆ ప్రశ్నకు సమాధానం ప్రముఖ రచయిత్రి, ఉపాధ్యాయురాలు వురిమళ్ళ సునంద రాసిన "బాలలకో బహుమతి" చెబుతుంది.. ఉపాధ్యాయురాలు కాబట్టి రోజూ పిల్లల్ని గమనించి, వాళ్ళ అల్లరి మనస్తత్వాలను అర్థం చేసుకుని,వారికెలాంటి కథలైతే ఎగిరి గంతులు వేస్తారో సరిగ్గా అలాంటి కథలే రాశారు సనంద అత్త. సరళమైన భాషలో, వారికి చదవడానికి తేలికగా ఉండేలా,ద్విత్వ సంయుక్తాక్షరాలు లేకుండా 14 కథల్ని రాసి బాలలకో బహుమతి పుస్తకం పేరుతో మనముందుకు తీసుకొచ్చారు. ద్విత్వ సంయుక్తాక్షరాలు లేకుండా కథలు, నవలలు చాలా తక్కువ వచ్చాయి.. డా.ఎం. హరికిషన్ లాంటి ప్రముఖ బాలసాహితీవేత్తలు ఇలాంటి రచనలు చేశారు..

ఇందులో మొదటి కథ చెలిమి విలువలో, జంతువుల పాత్రను పెట్టి, మనింటి దగ్గరో,వీధిలోనో, బడిలోనో మనం వినే "నువ్వు ఆ ఫ్రెండ్ తో స్నేహం చేయకు" అనే మాటలనే కథా వస్తువుగా తీసుకుని కథను అల్లారు.

పూర్తిగా పగలే ఉంటే బాగుంటుంది కదా ఎంచక్కా ఆడుకోవచ్చు, పూర్తిగా రాత్రే ఉండొచ్చు కదా ఎంచక్కా నిద్రపోవచ్చు అని ముద్దు ముద్దుగా పిల్లలు అడిగే కొన్ని గమ్మత్తైన ప్రశ్నలకు, మాటలకు సమాధానంగా ఓ కొత్త ఆలోచన చేసి "పగలు రేయి లేకుంటే" అనే చక్కని కథని అల్లారు. ఇలాగే "పాలు నీరు చెలిమి" అనే కథ కూడా భలే సరదాగా సాగుతూ ఆకట్టుకుంటాయి.

చిలిపి చిలుక కథలో, చిన్న పిల్లల మనస్తత్వం ఉన్న చిలుకను పాత్రగా పెట్టి, వాళ్ళ అల్లరిని అందంగా చూపించి, తెలివైన స్నేహితులు, పెద్దలు వారి అల్లరికి చెక్ పెట్టే అందమైన నెరేషన్ ఇందులో మనకు కనిపిస్తుంది.

ఇలా ఈ సంపుటిలో అన్నీ పిల్లల్ని ఆకట్టుకునే అంశాల్ని తీసుకుని, ఎక్కువగా జంతువుల పాత్రలను పెట్టి వాళ్ళ అల్లరి మనస్తత్వాలను చక్కగా చూపించే ప్రయత్నంలో సఫలీకృతులయ్యారు రచయిత్రి.ద్విత్వ సంయుక్తాక్షరాలు లేకుండా కథలు రాయడమనేది ఒక ప్రయోగంలా మనం చూడకుండా,కథల నిర్మాణం పరంగా చూస్తే పిల్లలకు సున్నితంగా ఎలా కథలు చెప్పాలో తెలుసుకోవచ్చు.పుస్తకం రూపం గురించి కొంచెం చెప్పాలి.లెటర్ సైజు(మనం A4 అని పిలిచే పేపర్ సైజ్)లో పుటలు, ఆయిల్ పేపర్ వాడి,ప్రతి పేజీలో పమ్మి ఉపేంద్రాచారి గారి అందమైన బొమ్మలతో అందంగా ముస్తాబు చేశారు. ఇలాంటి కథలు మన పిల్లల దాకా చేరగలిగితే రేపు మనం ఆశించే స్వచ్ఛమైన సమాజాన్ని చూడొచ్చు.తెలుగు బాలసాహిత్యంలో పిల్లల కోసం ఒక మంచి కథల బహుమతిని వెలువరించిన రచయిత్రి సునంద గారికి హృదయపూర్వక అభినందనలు.. బాల సాహిత్యంలో పిల్లల దాకా చేరే మరెన్నో రచనలు చేయాలని మనస్పూర్తిగా ఆకాంక్షిస్తున్నాం...